Олунньу 14 күнүгэр Нам улууһун киинигэр Култуура уонна духуобунас дыбарыаһыгар «Чэчир» сынньалаҥ киинин уус-уран салайааччыта Гликерья Николаева «Песни 90-х» авторскай бырайыага өрө күүрүүлээхтик, биир тыынынан ааста. Кэнсиэри иилээн-саҕалаан СӨ Култууратын туйгуна Иван Новиков уонна Таастаах нэһилиэгин «Чэчир» СК директора Надежда Аргунова ыыттылар. Ол курдук, «Кукушка», «Зима холода», «Младший лейтенант», «Единственная моя», «Спасибо, родная» о.д.а. сүрэхтэн сүппэт эрчимнээх ырыалар ылланнылар. Ааспыт кэм ырыаларын көрөөччүлэр олус чугастык ылынаннар тэҥҥэ ыллаһа олордулар, хас биирдии ырыа дууһаларын таарыйан долгутта.
Ангелина Атласова «Ветер с моря дул» Натали репертуарыттан ырыаны чуо-бааччы толорбутун истэ соһуйаҕын. Маны тэҥэ, Иванушки International бөлөх репертуарыттан «Тополиный пух» эрчимнээх ырыатын хамсанан-имсэнэн Августин Слепцов толорбуттара көрөөччүлэр куттарын тутуон тутта.
Быыс аһыллыаҕыттан сабыллыар диэри, кэнсиэр көрөөччү хабыллар ытыһын тыаһынан доҕуһуолланна.
Ааспыт үйэ ырыаларынан бырайыак иккис кэнсиэрэ табылынна, дьон-сэргэ сэҥээриитин ылла. Маннык улахан тэрээһини үрдүк таһымҥа ыытарга сүбэ-ама, күүс — көмө буолбут УНАДь үлэһиттэригэр, чуолаан кэнсиэр режиссеругар Туйаара Абрамоваҕа, бары кыттааччыларга ис сүрэхтэн МАХТАЛБЫТЫН тиэрдэбит!

«Чэчир» СК директора Надежда Аргунова