Олунньу 12 күнүгэр Таастаах уонна Салбан тыа сирин түөлбэлэриттэн 10 киһи делегациялаах биир өбүгэттэн төрүттээх, уустаах Атамай нэһилиэгэр ыалдьыттаан кэллибит.

Нэһилиэк баһылыга Айсен Егорович Павлов, саҥа арыллыбыт икки мэндиэмэннээх олохтоох дьаһалта, култуура уонна спорт уораҕайыгар арыылаах алаадьынан, буруонан ыраастаан үөрэ-көтө көрүстүлэр.

Итии чэй иһэн баран уораҕай иһигэр үлэлиир тэрилтэлэри көрдүбүт-иһиттибит. Олохтоох дьаһалта, почта, библиотека, музей, спорт зал, сынньалан киин үлэтэ оргуйан олорор.

Эбиэт кэннэ Быйыл Таастаах нэһилиэгэ 180 сыллаах үбүлүөйүн, эһиил Атамай нэһилиэгэ 395 үбүлүөйдээх сылын бэлиэтээри инники олохтоммут сибээһи быспакка, силигин ситимнээн, үйэтитэн, үбүлүөйдээх сылларбытын бииргэ бэлиэтииргэ анаан сүбэ мунньахха, кэпсэтиигэ, былааны ылыныыга муһуннубут.

Көрсүһүү түмүгүнэн үбүлүөйдээх сылларга Ала ууһун сыдьааннарын бары нэһилиэктэрин түмэн Правительство таһымыгар сөптөөх хамыыһыйа тэрийэн, үлэ былаанын бигэргэтэн бииргэ үлэлэһэргэ быһаары ылылынна.

Салгыы нэһилиэк уһуйааныгар, олохтоох урбаанньыкка, оскуолаҕа экскурсиялаатыбыт. Оскуола директора Мотрена Николаевна уонна Татьяна Афанасьевна хас биирдии кабинеттарыгар үөрэнээччилэрин сайдалларыгар туһуламмыт оборудованиеларын кэпсээтилэр, көрдөрдүлэр олус диэн интириэһи тартылар. Онон бэрт сырыыны сылдьан, сири-дойдуну көрөн, сүрдээҕин дуоһуйан , астынан аҕай кэллибит!