А.И.Николаев аатынан Бүлүү куоратын Албан аат түмэлэ тэрийбит Улуу Кыайыы 80 сылыгар уонна төрөөбүт төрүт тыл күнүгэр аналлаах  аһаҕас тылбаас күрэҕэр нэһилиэк олохтооҕо, пенсионер Валерий Семенович Евсеев уонна «Чэчир» сынньалаҥ киин үлэһитэ Анисья Николаевна Васильева кытыннылар. Кинилэр А.А.Сурков «Землянка» диэн хоһоонун уонна бэйэлэрэ талан ылбыт Аҕа дойду Улуу сэриитин кыайыытыгар анаммыт хоһоону сахалыы тылбаастаатылар. Республика үрдүнэн күрэххэ 30-н тахса үлэ киирбититтэн А.Н.Васильева “Хомоҕой тыл” анал ааты ыларга ситистэ. В.С.Евсеев күрэххэ кыттыбытын иһин туоһу суругу тутта.

Олунньу 14 күнүгэр Намтан «Ситим» айар-тутар бөлөх кэлэн имигэс үҥкүүлэринэн, ылбаҕай ырыаларынан олохтоохтору сэргэхситэн бардылар. Сааһыра барбыт дьон дьиэҕэ бүгэн хаалбакка бэйэлэригэр сөптөөх дьарык булунан олох үөһүгэр сылдьыахтарын сөбүн итэҕэттилэр. Көрөөччүлэр «Ситим» бөлөх сиэдэрэй көстүүмнэрин, араас омук үҥкүүлэрин үрдүк маастарыстыбалаахтык үҥкүүлээбиттэрин сөхтүлэр-махтайдылар.

Олунньу 15 күнүгэр Лариса Баишева салайааччылаах «Чэмэлиинэ» үҥкүү бөлөҕө Уус-Алдан Бороҕонугар “Танцует Мюрю-2025” диэн үһүс төгүлүн ыытыллар аһаҕас фестиваль-конкурска кыттан III степеннээх дипломант аатын ылан үөрэн-көтөн кэллиллэр.

Олунньу 16 күнүгэр саха ырыатын таптааччыларын куттарын туппут күүстээх куоластаах Иоганн Матвеев, алгысчыт, ырыаһыт, тойуксут Кылаан Кындыл Таастаах олохтоохторугар умнуллубат кэрэ киэһэни бэлэхтээтилэр. Икки чаас устата барбыт концерт устатын тухары көрөөччүлэр дохсун ытыс тыастара уҕараабата. Дьон ордук орто көлүөнэ сөбүлүүр ырыаларын ыллаабыттарын биһирээтилэр.